Camby varnarmaður ársins

Leikmaður, Lið	1.	2.	3.	Stig
1. Marcus Camby, Denver	70	23	12	431
2 .Bruce Bowen, San Antonio	22	26	18	206
3. Tim Duncan, San Antonio	15	22	17	158
4. Shawn Marion, Phoenix	7	12	22	93
5. Shane Battier, Houston	7	11	18	86

Marcus Camby hjá Denver var í dag valinn varnarmaður ársins í NBA.  Camby var langefstur í kjöri blaðamanna en í næstu sætum komu San Antonio Spurs leikmennirnir Bruce Bowen og Tim Duncan.
Ben Wallace sem var varnarmaður ársins 2002, 2003, 2005 og 2006 var í þetta skiptið aðeins í 6. sæti.

Camby hefur gert mjög góða hluti fyrir Denver, bæði í vörn og sókn og er vel að titlinum kominn.
Hann hefur þó hingað til verið duglegur að koma sér í fréttirnar fyrir hluti ótengda körfubolta og er ekki úr vegi að rifja upp nokkur atriði.

1997 var hann tekinn fyrir of hraðan akstur og við nánari athugun kom í ljós að hann var með töluvert magn marijúana í bílnum hjá sér og var í kjölfarið dæmdur til samfélagsþjónustu.

Á þeim tíma þegar það var verið að setja á reglur um klæðaburð hjá leikmönnum NBA fór mikið fyrir Camby að mótmæla því.  Hann heimtaði meðal annars fatastyrk frá deildinni ef hann ætti að klæða sig snyrtilega.  Hann var töluvert gagnrýndur fyrir þessi ummæla í ljósi þess að á þessum tíma var hann með rúmar 480 miljónir kr. í árslaun.

Loks var Camby einn af þeim sem tóku þátt í slagsmálum í leik New York Knicks og Denver Nuggets fyrr á þessu tímabili og var rekinn úr húsi.

Fín úrslit annars síðastliðna nótt sem setur smá pressu á Houston og Pheonix.  Detroit fór þó auðveldlega í gegnum Orlando og þeim verður ekki viðbjargað úr þessu.

Chicago Bulls mun svo fara til Miami í nótt og freista þess að komast í 3-0 gegn ríkjandi meisturum.
New Jersey Nets voru óheppnir að tapa öðrum leiknum í Toronto en fara þó með ágætis 1-1 stöðu heim til Jersey.
Í Dallas taka svo heimamenn á móti Golden State en eftir 6 leikja taphrinu í leikjum gegn Golden State tókst þeim loks að sigra þá í síðasta leik.


Leikur New Jersey og Toronto verður sýndur á NBA TV kl. 23.00.

Monta Ellis vinnur framaraverðlaun

Monta Ellis, leikmaður Golden State Warriors í NBA deildinni fékk í dag viðurkenningu fyrir mestu framfarir á árinu.
Ellis sem er á sínu öðru ári í deildinni skoraði að meðaltali 16,5 stig í leik og gaf rétt rúmar 4 stoðsendingar á móti 6,8 stigum og 1.6 stoðsendingum í fyrra.
Það verður þó að fylgja að Ellis lék næstum helmingi fleiri mínútur í leik í ár.  34,3 í leik á móti 18,1 í fyrra.

Í næstu sætum komu svo Kevin Martin, Deron Williams og Tyson Chandler.  Allt leikmenn sem að mínu mati hefðu frekar átt skilið að vinna. Fimmti varð svo lettneski félagi Ellis hjá Golden State, Andris Biedrins.

Top 5

Leikmaður, Lið	1.	2.	3.	Stig
1. Monta Ellis, Golden State	47	34	15	352
2. Kevin Martin, Sacramento	44	38	15	349
3. Deron Williams, Utah	13	6	18	101
4. Tyson Chandler, NOK	6	0	9	72
5. Andris Biedrins, Golden State	8	4	12	64

 

Í nótt verða svo þrír leikir.  Utah leikur heima gegn Houston, Orlando tekur á móti Detroit og Lakers færa Phenoix í heimsókn.  Heimaliðin þrjú eru öll 2-0 undir og ætla ég að spá því að eftir leiki næturinnar verði staðan orðin 3-0 í öllum viðureignunum.

Leikur Utah og Houston verður í beinni á NBA TV kl. 1 eftir miðnætti.

Þrír leikir í nótt

 

 

Dallas og San Antonio töpuðu bæði heimaleikjum í fyrsta leik, á móti Golden State og Denver.
Það er ekki vænlegt til árangurs að fara með 2-0 í útileikina og ætla ég að tippa á heimasigra í báðum leikjum. 
Þó vill maður alltaf óvænt úrslit og fleiri leiki og mundi það hrista verulega uppí þessari úrslitakeppni að fá Denver og/eða Golden State í 2-0

Cleveland taka svo á móti Washington á heimavelli og þrátt fyrir að LeBron James sé ekki algjörlega heill þá ætti þetta að verða tiltölulega auðvelt fyrir Cleveland. 
Antawn Jamison er ekki að fara að vinna leik uppá eigin spítur.  Á þó hrós skilið fyrir ágætis tilraun í fyrsta leiknum.

Leikur Dallas og Golden State er sýndur í beinni á NBA TV kl. 01:30.  Hina er hægt að finna á netinu.

Úrslit eftir bókinni og Barbosa 6th man...

Detroit vann Orlando 98-90 í nótt og Houston lagði Utah þar sem lokatölur urðu þær sömu.
Sigurliðin komu sér þar með bæði í þægilega 2-0 stöðu en leika næst tvo leiki á útivelli.


Í nótt verða svo hörkuleikir þar sem Chicago (1) leika á heimavelli gegn Miami (0).

Toronto (0) töpuðu fyrsta heimaleiknum á móti New Jersey (1) og er mjög mikilvægt fyrir þá að jafna metin á heimavelli í nótt áður en þeir halda til Jersey.

Loks taka Phenoix (1) á móti Lakers (0) en maður leiksins frá fyrri leiknum, Leandro Barbosa var einmitt í gær valinn af blaðamönnum Sjötti maður ársins.


Það eru íþróttafréttamenn frá Bandaríkjunum og Kanada sem standa að kjörinu en kosningin fer þannig fram að þeir velja leikmenn í fyrstu 3 sætin.   Fyrir 1. sætið eru gefin 5 stig, 3 stig fyrir 2. sætið 1 stig fyrir það 3.  Útfrá því er svo reiknaður heildarstigafjöldi en það er hann sem sker úr um sigurvegara.  Þeir leikmenn sem hafa komið inná í fleiri leikjum en þeir hafa byrjað koma til greina í kosningunni.

Hinn eldsnöggi Barbosa er vel að titlinum kominn. Hann hefur spilað mjög vel í vetur með 18.1 stig, 4 stoðsendingar og 2.7 fráköst að meðaltali í leik á 32.7 mínútum. Hann byrjaði 18 sinnum inná af þeim 80 leikjum sem hann lék.
Í öðru sæti var svo San Antonio Spurs leikmaðurinn Mano Ginobili en hann varð töluvert á eftir Barbosa í kosningunni.

Læt svo fylgja 5 efstu sætin í kosningunni:

Leikmaður, Lið	1.	2.	3.	Stig
1. Leandro Barbosa, Phoenix	101	24	1	578
2. Manu Ginobili, San Antonio	18	50	29	269
3. Jerry Stackhouse, Dallas	7	40	55	210
4. David Lee, New York	--	3	13	22
5. Kyle Korver, Philadelphia	1	2	8	19

Leikur Toronto og New Jersey verður í beinni á NBA TV í nótt en hina tvo leikina er hægt að sjá beint á netinu.

NBA: Detroit komið í 2:0 gegn Orlando

NBA Playoffs - Spá

Datt inná skemmtilega spá um úrslitakeppnina á http://eirikuro.blog.is/blog/eirikuro/entry/185068/ 
Hendi hér með minni spá inn og eins og Eiríkur bendir á væri gaman að búa til smá umræðu og stemningu í kringum þetta.

Dallas 4 - Golden State 2 – Það þekkir Dirk enginn betur en Don Nelson – styrkleika og veikleika.  Golden State fara með þetta í 6 leiki

Phoenix 4 - Lakers 2 -  Phoenix lenti í miklu basli með Lakers í úrslitakeppninni í fyrra en Lakers er búnir að vera skelfilega lélegir stóran hluti vetrarins.

San Antonio 4 - Denver 3 – Denver með besta varnarmann deildarinnar og tvo fáránlega skorara hægja aðeins á San Antonio en Spurs eru með alltof massíft lið til að detta út.

Houston 4 - Utah 1 – Eftir góða byrjun hefur Utah liðið ekki verið að gera merkilega hluti uppá síðkastið.  Með T-Mac og Yao heila getur Houston liðið farið langt.

Detroit 4 - Orlando 1 – Maður hefur ekki mikla trú á að Detroit liðið klikki en það hélt maður líka í fyrra áður en þeir fóru í bullið.  Ef þeir ætla að halda áfram að senda Orlando leikmennina á línuna í hverri sókn þá hljóta þeir að lenda í villuvandræðum amk einu sinni og tapa einum leik.

Cleveland 4 - Washington 1 – Það er ekki langt síðan að Washington var að berjast um 2.sætið í Austrinu.  Eftir að þeir misstu svo báða All-Star leikmennina sína í meiðsli hefur ekkert gengið og þeir eiga ekki breik í þessa seríu. Munu þó stela einum.

Toronto 4 - New Jersey 3 – Toronto byrjuðu á tapi á heimavelli í gær en ég ætla samt að spá þeim áfram.  Reynslan er auðvitað New Jersey megin en Toronto er með betra körfuboltalið.

Chicago 4 - Miami 3 – Þetta verður rosaleg sería eins og í fyrra en nú mun þetta detta Chicago megin.  Shaq er augljóslega ekki í sínu besta formi og Wade er langt frá því að vera heill.  Menn vildu meina að eini möguleiki Chicago á sigri væri ef Hinrich gæti spilað almennilega vörn á Wade.  Hinrich var þó lítið sem ekkert með í gær þegar Bulls komust í 1-0.

Snillingur (Video)

Þarf að ræða þetta eitthvað frekar?

Smellið á myndina til að sjá meira

 

Miðjan

 

Umfjöllun um leiki KR og Njarðvíkur verður að sjálfsögðu ekki endanlega hætt fyrr en þætti stuðningsmanna KR verður minnst. Fyrir þá sem urðu svo óheppnir að sjá ekki leikina í rimmunni verður stemningunni ekki líst. Þetta er hreint út sagt það magnaðasta sem sést hefur.

Heitustu stuðningsmenn KR voru mættir í höllina kl. 18 og fóru þaðan rétt fyrir 23.
Þá lá leiðin beint niður í miðbæ Reykjavíkur þar sem stuðningsmenn, leikmenn, þjálfarar og stjórnarmenn KR troðfylltu skemmtistaðinn Olíver þar sem var sungið, dansað og trallað stanslaust til að verða kl. 2 eftir miðnætti.  Að lokum var farin skrúðganga niður Laugarveginn sem innihélt allan pakkann; Nokkri tugi syngjandi stuðningsmanna, Íslandsmeistarabikarinn og svo voru að sjálfsögðu tendruð blys.  Allra heitustu stuðningsmennirnir héldu svo fögnuði áfram eitthvað fram á morgun og varð þar með sigurhátíð Vesturbæinga allt að 12 tímar!

Í dag tekur svo við að horfa á leikinn endursýndan á Sýn, halda áfram að fagna og vera stoltur af því að vera KR-ingur.

Svo er sumarið handan við hornið og í fótboltanum bíður önnur dolla sem bíður þess að komast heim í KR heimilið.

NCAA Finals

 

Í kvöld fer fram úrslitaleikurinn í NCAA háskóladeildinni í Bandaríkjunum.  Það eru lið Florida og Ohio sem leika til úrslita og hefst leikurinn kl. 01:21 eftir miðnætti.  Hann verður sýndur á stöðinni NASN sem næst á breiðbandi Símans.

Ohio State skólinn sem hefur í gegnum tíðina aðallega verið þekktur fyrir mjög gott fótboltalið eru búnir að spila gríðarlega vel í vetur með Greg Oden í fararbroddi.  Þeir lentu þó í töluverðu basli í bæði 32 og 16 liða úrslitum en unnu svo auðveldan sigur á Memphis í 8 liða úrslitum.Fyrrnefndur Oden er stærsta stjarna liðsins og var þeirra stigahæsti leikmaður á tímabilinu auk þess að taka flest fráköst.  Bíða menn í ofvæni eftir að sjá hann leika í NBA deildinni og má nær öruggt telja að hann verði valinn nr. 1 eða 2 í nýliðavalinu í sumar. 
Aðrir leikmenn sem má fylgjast vel með eru Mike Conley Jr. og Ron Lewis sem gætu einnig dottið inní NBA fyrir næsta vetur 

Florida kom skemmtilega á óvart í fyrra og fór alla leið í mótinu.  Í ár hafa þeir svo verið taldir mjög sigurstranglegir allt frá byrjun enda með nákvæmlega sama byrjunarlið og á meistaratímabilinu í fyrra.  Þeir hafa hingað til staðist allar þær væntingar sem til þeirra hafa verið gerðar og rúllað nokkuð þægilega í gegnum bæði riðlakeppnina sem og úrslitakeppnina.
Eins og fyrr segir hélt Florida liðið öllum byrjunarliðsmönnum sínum frá því í fyrra en það er nokkuð ljóst að svo verður ekki aftur eftir þetta tímabil.  Það er jafnvel talið líklegt að Florida skólinn muni skila 3 leikmönnum í NBA fyrir næstu leiktíð og hugsanlega munu þeir allir verða valdir í fyrstu umferð nýliðavalsins. 
Þetta eru þeir Al Horford, Joakim Noah og Corey Brewer. 

Á laugardaginn fóru fram undanúrslitaleikirnir þar sem Ohio lagði Georgetown og Florida sigraði lið UCLA skólans.  Það voru flestir sem spáðu einmitt þessum úrslitum og þurftu hvorugt liðið að hafa sérstaklega fyrir því að stimpla sig inn í úrslitaleikinn.   

Ohio sigraði Georgetown 67-60 í leik þar sem Greg Oden tók minni þátt í en planað var, lék t.d aðeins 3 mínútur í fyrri hálfleik en hann lenti snemma í villuvandræðum og hefur það vandamál reyndar loðað við hann í allan vetur.  Mike Conley Jr. lék hinsvegar skínandi vel fyrir Ohio og skilaði 15 stigum og 6 stoðsendingum. 

Hinn undanúrslitaleikurinn var endurtekning á úrslitaleiknum í fyrra þar sem lið Florida og UCLA áttust við.  Þar kláraði Florida leikinn án teljandi vandræða og var það sama uppá teningnum á laugardaginn.  Lokatölur 76-66 í leik þar sem Corey Brewer skoraði 19 stig og Al Horford hirti 17 fráköst. 

Í desember áttust liðin sem leiki í kvöld einnig við í leik sem varð aldrei spennandi og þegar yfir lauk hafði Florida liðið skorað 86 stig gegn 60 stigum Ohio manna sem voru niðurlægðir á öllum sviðum körfuboltans.Menn benda þó á að í þeim leik var Greg Oden aðeins rétt skriðinn uppúr úlnliðsmeiðslum sem höfðu hrjáð hann í nokkurn tíma og gat því ekki beitt sér að fullu.  Hann lenti einnig í villuvandræðum í þeim leik og skoraði aðeins 7 stig.  Al Horford átti hinsvegar góðan leik í liði Flordia og vann einvígið við Oden í það skiptið. 

Það er þó alveg ljóst að Ohio menn munu ekki láta þetta gerast aftur.  Þeir hafa ekki tapað leik síðan 9. janúar, unnið 22 leiki í röð og eru til alls líklegir.Florida liðið hefur líka leikið vel, unnið 9 leiki í röð og í þeim leikjum hafa þeir eininugis tvisvar fengið á sig meira en 70 stig. Það er litið mikið til baráttu stóru mannana Al Horford og Greg Oden sem verður gríðarlega skemmtilegt einvígi sem mun þegar uppi er staðið vega þungt. 

Það mun þó líka mæða mikið á bakvörðum liðana sem eru gríðarlega öflugir.Hjá Florida eru þeir Lee Humphrey og Taurean Green báðir miklar skyttur og hjá Ohio er Mike Conley Jr. mjög drjúgur og eru margir á því að þrátt fyrir að hafa fallið í skugga Oden sé hann mikilvægasti leikmaður liðsins sem hefur haldið liðinu uppí þegar Oden hefur ekki verið með eða lent í villuvandræðum.  Ron Lewis er einnig góður leikmaður sem hefur sett niður mikilvæg skot fyrir liðið í vetur. 

Ef að Florida vinnur leikinn verða þeir fyrsti skólinn til að vinna titilinn tvö ár í röð síðan Duke gerði það fyrir 15 árum og þeir fyrstu í sögunni til að vinna tvo titla í röð með sama byrjunarlið.

Ohio hefur ekki unnið titilinn síðan 1960 en þeir töpuðu svo úrlslitaleikjum næstu tvö ár á eftir.

Cesc Fabregas

Einhver eðlileg skýring á því að Cesc Fabregas var ekki rekinn útaf ?

Einhver eðlileg skýring á því að John Obi Mikel var rekinn útaf ?

Framkoma leikmanna Arsenal manna undir lok þessa leiks var þvílíkt til skammar að annað eins hefur ekki sést.

Chelsea deildabikarmeistari - þrjú rauð spjöld í lokin