Earl Boykins

Ef það er einhver leikmaður sem komið hefur á óvart í NBA deildinni í ár þá er það klárlega hinn smái en knái Earl Boykins. Boykins sem er 1.65 á hæð er minnsti leikmaður deildarinnar og sá næstminnsti í sögunni, aðeins Muggsy Bogues (1.60) er minni.  Boykins er ekki bara lágvaxinn heldur er hann einungis 60 kg. en tekur þó að sögn liðsfélaga sinna 140 kíló í bekk !, geri aðrir betur.

Boykins hóf feril sinn í deildinni með New Jersey árið 1998 en fékk lítið að spreyta sig og árið 2000 gekk hann til liðs við L.A. Clippers eftir að hafa komið við hjá bæði Cleveland og Orlando.  Hann spilaði tvö tímabil með Clippers og það var ekki fyrr en á seinna tímabilinu sem hann lék sinn fyrsta leik sem byrjunarmaður í NBA en byrjaði þó bara tvo leiki af 68. Næsta tímabil lá leiðin í Golden State en þar voru tækifærin ekki mikið fleiri, hann spilaði þó 68 leiki en byrjaði aldrei.  Hann entist ekki lengi hjá Golden State og árið 2003 gekk hann til liðs við Denver.  Þetta reyndist mikið framfaraskref og í fyrsta skipti var hann að spila meira en 20 mínútur að meðaltali í leik sem skilaði sér í 10.2 stigum en hann hafði aldrei farið yfir 10 stigin að meðaltali áður.  Hann spilaði vel næstu tvö tímabil hjá Denver og var þrátt fyrir að ná ekki að tryggja sér sæti í byrjunarliðinu mikilvægur hluti af Denver liðinu.  Það var svo í byrjun þessa tímabils sem Boykins sló í gegn. Í þeim 31 leik sem hann spilaði skoraði hann að meðaltali 15.2 stig sem var það langhæsta hjá honum á ferlinum og gaf auk þess rúmar 4 stoðsendingar og bætti við 2 fráköstum.

Með tilkomu Allen Iverson í desember sáu forráðamenn Denver hinsvegar fram á að þurfa að lækka launakostnaðinn hjá liðinu og ákváðu að láta Boykins fara.  Milwaukee sem hafði verið í mikul meiðslavandræðum allt tímabilið voru fljótir að semja við hann og nú lítur út fyrir að það sé að hefjast nýr kafli á ferli þessa litla en gríðarlega snögga leikmanns.
Hjá Milwakukee hefur hann byrjað gríðarlega vel.  5 leikir, allir í byrjunarliðinu, 40.6 mínútur, 2.8 fráköst, 6.2 stoðsendingar og 18 stig eru frábærar tölur og þó að liðinu hafi ekki gengið sem best þá verður að taka með í reikninginn að þeir eru með mjög góða leikmenn í þeim Michael Redd, Maurice Williams og Charlie Villanueva en þeir hafa allir misst af síðustu leikjum vegna meiðsla.

Hvort Boykins haldi sæti sínu í byrjunarliðinu þegar Þeir Redd og Williams koma til baka verður að koma í ljós en það er klárt mál að hann hefur stimplað sig betur inn en menn þorðu að vona og sett Terry Stotts þjálfara í erfiða aðstöðu þegar kemur að því að velja liðið með alla klára.

 

Þjálfaraskipti hjá Timberwolves

 

Dwayne Casey þjálfari Minnesota Timberwolves í NBA deildinni var í gær rekinn frá liðinu eftir 4. tap liðsins í röð, nú gegn Utah.  Liðinu hefur þó gengið ágætlega á tímabilinu, er með 50% vinningshlutfall og er í 8. sæti Vesturdeildarinnar og þar með eins og staðan er í dag inni í úrslitakeppninni en þangað hefur liðið ekki komist síðan tímabilið 2003-2004 þegar þeir töpuðu í úrslitum Vestursins gegn LA Lakers.

Casey hafði stýrt liðinu síðan í Júní 2005 en áður hafði hann verið aðstoðarþjálfari hjá Seattle, þjálfað í Japan og í Háskólaboltanum.  Þar var hann dæmdur í ævilangt bann árið 1990 eftir að hafa verið sakaður um ólöglegar greiðslur til leikmanna, en þær voru þó aldrei sannaðar á hann.

Við liðinu tekur nú aðstoðarþjálfarinn Randy Wittman sem áður þjálfaði Cleveland á árunum 1999-2001.  Fyrsti leikur hans er í kvöld gegn Portland og verður athyglisvert að sjá hvort hann geti snúið við blaðinu og komið liðinu á sigurbraut á ný.

 

NBA 23. janúar 2007

6 leikir spilaðir í nótt og lítið um óvænt úrslit.

Orlando  95 - 111 Dallas
Nelson 23/3    Nowitzki 33/10/8       
                                       
Philadelphia 102 - 96 New Orleans
Korver 25/4            Brown 24/3             
                                       
Washington 105 - 127 Phoenix
Arenas 31/5           Nash 27/3/14           
                                       
Chicago 94 - 86 Atlanta
Deng 18/5      Johnson 29/4           
                                       
Seattle 112  -  117 Denver       
Allen 44/3         Anthony 34/9, Iverson 21/10           
                                       
LA Clippers 115-96 Milwaukee 
Brand 25/7           Bell 24/6